Macarıstan yığmasının baş məşqçisi Marko Rossi Xorvatiya və Azərbaycan milliləri ilə keçirəcəkləri AVRO-2020-nin seçmə oyunları barədə fikirlərini bildirib. İtaliyalı mütəxəssis qrupdan çıxmaq şansları haqda maraqlı fikirlər səsləndirib:
"Püşkatmadan dərhal sonra bəyan etmişdim ki, Azərbaycan millisini heç kim qiymətləndirməyə bilməz və onlar qrupda inamlı şəkildə duruş gətirəcəklər. Azərbaycanın sentyabrdakı 2 oyunu xoş sözlərə layiqdir. Onlara qalib gəlmək üçün ən yaxşı cəhətlərimizin lazım olacağına əminəm.
Biz Xorvatiya və Azərbaycanla, daha sonra Uelslə görüşdə ən yaxşı nəticəni qazanmağa can atırıq. Lakin bu 3 rəqibin hamısını udacağımızı söyləyəcək qədər dəli deyiləm. Hazırda Avropa çempionatına vəsiqə üçün mübarizə apardığımızdan danışmaq xoşdur. Unutmayaq ki, Macarıstan 4-cü səbətdən çıxıb.
Xorvatiyada meydana ağ bayraqla çıxmayacağıq. İndiki vəziyyətdə yalnız bunu təkrar edə bilərəm: Splitdə nə baş verəcəyindən asılı olmayaraq, Azərbaycanı məğlub etməliyik".
Qeyd edək ki, oktyabrın 13-də Budapeştdəki “Groupama Arena”da keçiriləcək Macarıstan – Azərbaycan oyunu Bakı vaxtı ilə saat 20:00-da başlanacaq. Xorvatiya ilə oyun isə oktyabrın 9-da Splitdəki "Polyud" stadionunda saat 22:45-də start götürəcək.