news-details
Xəbərlər

Rafael Vilela: “Hələ mübarizə başa çatmayıb”

Avropa çempionatının final mərhələsində İspaniya yığması ilə heç-heçə edən (2:2) millimizin hesabda önə keçməsində Rafael Vilelanın rolu danılmazdır. Onun qapı xəttinə parallel ötürməsi rəqib futzalçıya dəyərək tora daxil oldu. Hücumçu matçla bağlı fikirlərini federasiyanın saytına açıqlayıb:

“Gürcüstanla oyunda iki qol vurdum və komandama kömək etməyə çalışdım. Təəssüf ki, üstünlüyümüzü qoruya bilmədik və vacib oyunda yenildik. Halbuki növbəti addım üçün bu qarşılaşmanın əhəmiyyəti danılmazdır.

İspaniyaya qarşı isə daha yaxşı oynadıq. İki dəfə hesabda önə keçdik, yenə qələbəni qoruya bilmədik. Amma turnirin favoritlərindən biri hesab edilən ispanlarla dueldə heç-heçə pis nəticə deyil. Onlara qarşı bir neçə dəfə mübarizə aparmışam. Həqiqətən də çox güclü rəqibdir. Məncə, ilk dəfə rəsmi oyunda İspaniyaya uduzmuruq. Nəticəni super hesab etmirəm, super nəticə qələbə olan zaman deyirlər, amma dünya reytinqinə başçılıq edən komanda ilə xalları yarı bölmək asan olmadı. Hətta sona yaxın qələbə qolunu da vura bilərdik.

Onlar bu cütün favoriti hesab edilirdilər. Amma biz oyunumuzla istənilən güclü komanda ilə başabaş mübarizə aparmağa hazır olduğumuzu göstərdik.

Hələ mübarizə başa çatmayıb. Məşqlərimizi davam etdirəcəyik, Bosniya Herseqovina ilə oyuna ciddi hazırlaşacağıq. Hər bir qələbə bizim üçün vacibdir. İşimizi görməliyik. Ümid edirik ki, son turda Gürcüstan millisi ispanları büdrədəcək”.

Digər xəbərlər