news-details
Xəbərlər

PFL rəsmisi: Çempionatlar avqustun əvvəlinə kimi tamamlanmalıdır

Peşəkar Futbol Liqası (PFL) Avropa Peşəkar Futbol Liqaları (EPFL) ilə məlum periodda sayca 3-cü videokonfransda iştirak edib. Bu barədə PFL-in texniki idman şöbəsinin rəisi Elgiz Abbasov bildirib. O qeyd edib ki, öncəki görüşlərdə olduğu kimi bu dəfə də üzv liqalara UEFA-nın işçi qruplarında gedən müzakirələr, Avropada liqalar üzrə hazırkı vəziyyət haqqında məlumat verilib, optimal yenidən başlamaq ssenariləri barədə üzv liqaların planları nümayiş etdirilib.

Ümumilikdə 51 nəfərin iştirak etdiyi konfransda PFL də öz növbəsində vəziyyəti açıqlayıb və hadisələrin tezliklə müsbətə doğru dəyişəcəyinə ümid etdiyini bildirib.

UEFA-nın təqvim hazırlanması üzrə fəaliyyət göstərən işçi qrupunda hazırda yalnız 1 ssenari üzərində danışıqlar aparılır: yerli çempionatlar avqust ayının əvvəlinə kimi (dəqiq gün yoxdur) tamamlanır, UEFA 2019/2020 mövsümündən yarımçıq qalan yarışlarını isə avqustun sonunadək başa çatdırır. Qitə səviyyəli 2020/2021 klub yarışlarına seçmə mərhələlərin isə avqustun əvvəlindən başlanılması planlaşdırılır.

Lakin istənilən halda bu plan yenə də yekun təklif, yaxud qərar qüvvəsində deyil. Çünki UEFA İcraiyyə Komitəsinin 27 may üçün nəzərdə tutulan iclası 17 iyuna təxirə salınıb. Üstəlik, bir sıra ölkələrdəki qeyri-müəyyənlik bu təklifin nə dərəcədə real olub-olmadığını sual altına alır. Bununla yanaşı, əvvəlki bütün ssenarilərin üzərindən xətt çəkilib və yalnız bu ssenari üzərində durulur. Görünür ya belə, ya da buna bənzər bir səviyyədə yekun bir nəticəyə varılacaq.

Digər bir maraqlı məlumat isə transfer pəncərəsi və oyunçu müqavilələri ilə bağlıdır. Hazırda müzakirə edilən ssenariyə əsasən, yay transfer dövrü 12 həftə davam etdiyi üçün ən tez 12 iyulda başlayıb, 5 oktyabrda qurtara bilər. Çünki 1 oktyabr növbəti mövsüm UEFA klub yarışlarına vəsiqə əldə etmək üçün keçirilən təsnifat mərhələsində son play-off oyun günü, ondan 2 həftə sonrası isə yarışların başlama tarixi kimi nəzərdə tutulur. Ancaq bu məsələdə də sual doğuran bir sıra məqamlar var.

Ən əsası odur ki, FIFA qaydalarına əsasən transfer pəncərəsi çempionat tam başa vurulduqdan sonra açıla bilər. Hansısa ölkə daxili çempionatını nəzərdə tutulan tarixə kimi başa vura bilməsə, necə olacaq? Bu o çempionatdakı klublar üçün transfer pəncərəsində vaxt itkisi deməkdir. İndiki halda liqaların nəzərdə tutulan tarixədək başa vurulmasını ehtimal etmək çətindir. Çünki situasiya hər an dəyişə bilər. Hər bir halda yaxın vaxtlarda UEFA-nın bu tip problemləri özündə birləşdirən və üzv assosiasiyaların ümumi marağı fonunda hazırlanan bir bəyanat yayacağı bildirilib.

Konfransda FIFA-da yaradılan işçi qruplardakı EPFL nümayəndəsi də çıxış edib. O, hazırda qurumun milli komandaların oyun cədvəli üzərində çalışdığını bildirib. Burada gedən müzakirələrə əsasən, FIFA sentyabr-oktyabrda milli komandaların qarşılaşmasını keçirməməyi, əvəzində noyabr-dekabrda ümumilikdə 10 oyun günündən ibarət bir qrafik hazırlamağı düşünür. Amma digər hər məsələ kimi, bu da dəqiq deyil və ölkələrdəki vəziyyətdən asılıdır.

EPFL üzv liqaları arasında çempionatlarını davam etməsi rəsmiləşənlər aşağıdakılardır:

Avstriya – 2 iyun
Almaniya – 16 may
Çexiya – 25 may
Danimarka – 28 may
İsrail – 30 may
Litva – 30 may
Norveç – 16 iyun
Portuqaliya – 4 iyun
Polşa – 29 iyun
Rusiya – 21 iyun
Serbiya – 30 may
Türkiyə - 12 iyun

EPFL üzv liqaları arasında çempionatlarını tamamlamadan başa vuranlar:

Belçika
Fransa
Hollandiya
Şotlandiya

Digər xəbərlər