Şahmatçımız Şəhriyar Məmmədyarov onlayn turnirə dəvət alıb. Beynəlxalq Şahmat Federasiyasının rəsmi saytının məlumatına görə, qrossmeyster Birləşmiş Ərəb Əmirliklərinin Şarcah şahmat klubunun təşkil edəcəyi beynəlxalq çempionatda qüvvəsini sınayacaq.
Məmmədyarovla yanaşı, turnirdə özbəkistanlı Rüstəm Qasımcanov, hindistanlı Pentala Xarikrişna, Amerika Birləşmiş Ştatlarından Ceffri Syun, misirli Bassem Amin və Birləşmiş Ərəb Əmirliklərindən Saleh Salem iştirak edəcəklər.
Mükafat fondu 10 min ABŞ dolları olan turnir 12-13 iyunda keçiriləcək. Ən güclü şahmat turnirlərindən hesab olunan yarış 2 dövrədən ibarət olacaq.
Məmmədyarov daha öncə FIDE-nin təşkilatçılığı ilə təşkil edilən Onlayn Steynits Memorealında iştirak etmişdi. Norveçli dünya çempionu Maqnus Karlsenin qalib adını qazandığı turnirdə Şəhriyar 4-cü olmuşdu.