Şahmat üzrə dünya çempionu Maqnus Karlsenin təşkil etdiyi Çempionlar Turunun 4-cü mərhələsində ikinci oyun gününə yekun vurulub.
“Magnus Carlsen Invitational” adlanan yarışda Azərbaycan təmsilçiləri Teymur Rəcəbov və Şəhriyar Məmmədyarov daha 5 görüş keçiriblər.
Məmmədyarov 6-cı turda FİDE bayrağı altında çıxış edən Alireza Firuzcaya, 7-ci turda Maqnus Karlsenə, 8-ci turda ispaniyalı David Antona uduzub. 9-cu turda isveçli Nils Qrandeliusa qalib gələn Şəhriyar, 10-cu turda da Niderland təmsilçisi Aniş Giriyə məğlub olub.
Teymur isə günü qələbəsiz başa vurub. O, ilk 3 partiyada ABŞ-dan olan Hikaru Nakamura, niderlandlı Yorden van Forest və fransalı Maksim Vaşye-Laqravla sülh bağlayıb. 9-cu turda Alireza Firuzcaya məğlub olan Rəcəbov, 10-cu turda Maqnus Karlsenlə heç-heçə edib.
Turnirin ümumi mükafat fondu 220 min ABŞ dollarıdır. Qalib şahmatçı 60 000, finalçı 40 000, 3-cü yerin sahibi isə 25 000 ABŞ dolları qazanacaq. Yarış martın 21-də yekunlaşacaq.