“2017-ci ildə Avropa çempionu titulu aldığıma çox sevinirdim, lakin bu qələbə mənim üçün daha dəyərlidir, çünki sabit inkişafımın sübutudur”. Bunu ikiqat Avropa çempionu Hidayət Heydərov Avropa Cüdo Birliyinin (EJU) son məqaləsi üçün verdiyi müsahibəsində bildirib.
Bolqarıstanın paytaxtı Sofiyada keçirilən Avropa çempionatının ikinci günü -73 kq çəki dərəcəsində mübarizə aparan Hidayət Heydərov bütün rəqiblərini geridə qoyaraq final mərhələsində italiyalı rəqibi Covanni Esposito ilə üzləşib. O, rəqibinə “golden score” bölümündə 24 saniyəyə “vaza-ari” ilə qalib gələrək, ikiqat Avropa çempionu olub.
EJU-nun rəsmi saytında Heydərov qələbəsini belə şərh etdi: “-81 kq -dan sonra -73 kq çəki ilə yarışlara qayıtdığım üçün çox şadam, bu çəki dərəcəsində özümə daha çox hakim olduğumu hiss edirəm və bu turnirdə yenidən iştirak etdiyim üçün çox xoşbəxtəm”.
Çempionun sözlərinə görə, karyerasının çox maraqlı tarixi var. O artıq yeniyetmələr, gənclər və böyüklər arasında titula sahibdir.
Eyni zamanda, məqalədə bildirilir ki, cüdo sahəsində olanlar Rüstəm Orucov və Hidayət Heydərov arasındakı əzəli rəqabətdən məlumatlıdır, lakin Hidayətin qalibiyyətindən sonra iki cüdoçu bu qələbəni qardaş kimi bayram ediblər.
Eyni çəki dərəcəsində yarışan R.Orucov təsəlliverici mərhələdə rumıniyalı Alexandru Raykunu məğlub edərək bürünc medal görüşünə vəsiqə qazanıb. Daha sonra rumıniyalı idmançı Adrian Sulkaya qalib gələrək millimizin aktivinə bürünc medal yazdırıb. Qeyd edək ki, R.Orucov artıq Avropa Çempionatında 5-ci dəfə mükafatçı olub. Onun artıq qitə çempionatında 1 qızıl, 1 gümüş və 3 bürünc medalı var.
İdmançıları müşahidə edən baş məşqçi Riçard Tarutman yarışlar zamanı həyəcanlı və eyni zamanda gərgin görsənirdi. Məşqçi Avropa Cüdo Birliyinə verdiyi müsahibədə bildirib ki, cüdo Azərbaycanda olimpiya medalı gözlənilən 3 əsas idman növlərindən biridir. “Təzyiqi hiss etsə də, bu, Heydərov üçün yaxşı çağırışdı”, - Trautman deyib.
Beləliklə, 40 ölkədən 363 idmançının qatıldığı turnirin ikinci günündə Azərbaycanın kişilərdən ibarət yığma komandası ikinci yerdə qərarlaşıb.