UEFA Avropa Konfrans Liqasında 2-ci təsnifat mərhələsinin püşkü atılıb. Azərbaycan təmsilçilərindən "Neftçi", "Zirə" və "Qəbələ"nin də rəqibləri bəlli olub.
Püşkatma zamanı “Neftçi” səpələnmiş, digər iki komanda səpələnməmişlər səbətində yer almışdı.
“Ağ-qaralar” bu raundda Kiprin “Aris” klubu ilə üz-üzə gələcək. İlk oyun səfərdə, cavab görüşü isə evdə baş tutacaq.
“Zirə” Təl-Əviv “Makkabi”sinə (İsrail) rəqib olub. Rəşad Sadıqovun komandası ilk oyunu evdə, cavab görüşünü səfərdə keçirməli olacaq.
“Qəbələ” isə Macarıstanın “Fehervar” komandası ilə düşüb. İlk oyun səfərdə, cavab görüşü evdə olacaq.
Bundan əlavə, "Qarabağ" Çempionlar Liqasında "Lex" səddini keçə bilməsə, Avropa Konfrans Liqasının II təsnifat mərhələsində “Slovan” (Slovakiya) – “Dinamo” (Batumi, Gürcüstan) cütünün məğlubu ilə qarşılaşacaq.
Avropa Konfrans Liqasında 2-ci təsnifat mərhələsinin ilk oyunları 21 iyulda, cavab görüşləri 28 iyulda keçiriləcək.