Bu gün UEFA Avropa Konfrans Liqasında II təsnifat mərhələsinə yekun vurulub. Azərbaycan təmsilçiləri - "Neftçi", "Qəbələ" və "Zirə" də cavab oyunlarını keçiriblər.
"Qəbələ" evdə Macarıstan təmsilçisi "Fehervar"ı qəbul edib. "Qırmızı-qaralar" rəqibi üzərində 2:1 hesablı qələbə qazansa da, ilk oyunun nəticəsinə (4:1) əsasən Avropa Konfrans Liqası ilə vidalaşıb.
"Neftçi" "Bakcell Arena"da "Aris"i sınağa çəkib. Təmsilçimiz Kiprdəki məğlubiyyətin əvəzini artıqlaması ilə çıxaraq (3:0) Avropa Konfrans Liqasında III təsnifat mərhələsinə yüksəlib. "Neftçi" bu raundda Avstriyanın "Rapid" (Vyana) klubu ilə üz-üzə gələcək.
"Zirə" isə İsraildə "Makkabi" (Təl-Əviv) komandasının qonağı olub. Matç qolsuz bitib. Bakıdakı ilk görüşdə 0:3 hesabı ilə uduzan "Zirə" avrokuboklarda mübarizəni dayandırıb.
UEFA Avropa Konfrans Liqası
II təsnifat mərhələsi, cavab oyunları
"Qəbələ" (Azərbaycan) - "Fehervar" (Macarıstan) - 2:1
Qollar: R.Muradov, 34. F.Santos, 73 – B.Zivzivadze, 44.
Hakimlər: Kristofer Yager, Robert Ştaynaxer, Santino Şrayner, Markus Hameter (Avstriya)
Qəbələ şəhər stadionu
İlk oyun - 1:4
"Neftçi" (Azərbaycan) - "Aris" (Kipr) - 3:0
Qollar: Q.Donyo, 38. E.İsrafilov, 57. K.Sayef, 62
Hakimlər: Bastian Dankert, Yan Zaydel, Eduard Baytinger, Sven Yablonski (Almaniya)
Bakı, "Bakcell Arena"
İlk oyun - 0:2
"Makkabi" (Təl-Əviv, İsrail) - "Zirə" (Azərbaycan) - 0:0
Hakimlər: Mario Zebets, Xrvoe Radiç, Luka Puşiç, Ante Çulyak (Xorvatiya)
Təl-Əviv, "Blumfild" stadionu
İlk oyun - 3:0