İtaliya Superkubokunun qalibi müəyyənləşib. Həlledici oyunda “Milan” və “İnter” komandaları üz-üzə gəliblər.
Səudiyyə Ərəbistanının paytaxtı Ər-Riyaddakı Kral Fəhd adına Beynəlxalq Stadionda keçirilən oyun “İnter”in 3:0 hesablı qələbəsi ilə yekunlaşıb. Qolları Federiko Dimarko, Edin Ceko və Lautaro Martines vurublar.
Nəticədə “İnter” ardıcıl 2-ci, bütövlükdə isə 7-ci dəfə superkuboku qazanıb.
Xatırladaq ki, “Milan” ölkə çempionu, “İnter” isə ölkə kubokunun sahibi kimi superkubok matçında oynamaq hüququ əldə etmişdi.
İtaliya Superkuboku 1988-ci ildən keçirilir, ən titullu komanda 9 qələbəsi olan Turinin “Yuventus”udur.